Pas sulmit të piratëve, rikthehen faqet në internet të “Top Media”-s

Sitet më të klikuara nga shqiptarët u bllokuan disa ditë (Kjo eshte relative se edhe ne po klikohemi goxha ditet e fundit 😛 )

Faqet zyrtare të televizionit “Top Channel” dhe gazetës “Shqip” iu rikthyen lexuesit në internet. Pas një shkëputjeje të shkurtër, për shkak të sulmeve që iu bënë këtyre faqeve online, të dyja këto hapësira të dashura për shqiptarët brenda dhe jashtë vendit, janë të gatshme tanimë të ofrojnë informacionet më të sakta dhe të shpejta. Sulmi ishte i llojit DoS (Denial of Service), që, sipas ekspertëve të informatikës, është një metodë sulmi ku personi apo personat që sulmojnë, i dërgojnë serverit një sasi të caktuar kërkesash për lidhje, të mjaftueshme për të zënë gjithë burimet e serverit. Me fjalë të tjera, nëse serveri ka kapacitet të mbajë 10000 lidhje njëherësh, sulmuesi, me anë të një skripti, dërgon 10000 kërkesa të menjëhershme drejt serverit, duke zënë të gjithë hapësirën dhe duke bërë të pamundur për përdoruesit e vërtetë që të lidhen me serverin. Goditja duket të jetë bërë e qëllimshme dhe e organizuar, për shkak të numrit të lartë të vizitave online që kanë këto faqe të “Top Medias”. Këto probleme rezultojnë se tanimë janë shmangur plotësisht nga stafi i ekspertëve të informatikës pranë kompanisë “Top Media”. Ata kanë ndërhyrë, duke garantuar qëndrueshmërinë e faqeve përballë sulmeve të këtij lloji përmes internetit. Që nga kjo javë, faqet janë të kompletuara me informacione të bollshme në shërbim të lexuesve të shumtë në Shqipëri dhe jashtë saj. Faqja zyrtare e gazetës “Shqip” dhe e televizionit “Top Channel” rezultojnë të jenë ndër faqet shqiptare më të vizituara në internet. Sipas Alexa.com, që është një faqe statistikash për vizitueshmërinë e faqeve, mes gjithë websiteve të botës, gazeta “Shqip” është faqja e 37 më e vizituar nga shqiptarët. Sakaq, televizioni “Top Channel”, përmes faqes zyrtare në internet, renditet në këtë listë në pozicionin e shtatë, duke pasur para vetëm faqet e tilla si “Google”, “Yahoo”, MSN apo “Facebook”, që konsiderohen faqet më të përhapura në gjithë botën.

/Gazeta Shqip/